2Cor 10 | BOJ | STEP | Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Corinthians 10

Tamo qudei naŋgi Pol qa yomu anjam maroqneb. Deqa a na kamba naŋgi anjam minjrej

1 Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye. 2 Ijo anjam agiende. E niŋgi qa bqai di e niŋgi qa bosiy anjam siŋgila na merŋgwasai. E laesqai. Ariya e are qalonum, nuŋgo ambleq di tamo qudei naŋgi iga qa endegsib mareqnub, iga mandam tamo naŋgo kumbra dauryosim laqnum. Naŋgi iga qa degsib mareqnub deqa e niŋgi qa bosiy tamo naŋgi di anjam siŋgila na minjrqai. E laesqasai. 3 Bole, iga mandam endia sosim waueqnum. Ariya iga mandam tamo naŋgo kumbra na qotosaieqnum. 4 Qotei a qoto qa iŋgi iŋgi egej di mandam qaji iŋgi iŋgi sai. Iŋgi iŋgi di Qotei aqa siŋgila ti unu. Iga dena qotoqnsim gago jeu tamo naŋgo siŋgila gotraŋyeqnum. 5 Areqalo uge uge ti gisaŋ anjam na ti tamo naŋgi Qotei qalieqajqa gam getentetnjreqnu deqa iga na olo gotraŋyeqnum. Osim iga tamo naŋgo areqalo kalil bulyetnjreqnam naŋgi Kristus aqa anjam dauryqajqa are qaleqnub. 6 Deqa iga niŋgi qa tariŋeqnum. Niŋgi gago anjam kalil dauryekritibqa ariya tamo kalil Qotei aqa anjam gotraŋyeqnub qaji naŋgi di iga na olo ŋolawotnjrqom.

7 Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem. 8 Tamo Koba Yesus a na iga siŋgila egej deqa iga aqa wau ojeqnum. Di kiyaqa? Iga na nuŋgo areqalo Yesus qa siŋgilateqnub qaji di olo siŋgilatetŋgwajqa deqa. Iga niŋgi ugeugeiŋgwajqa deqa sai. Deqa e gago wau endeqa areboleboleibim gago ñam yala soqtqai di e deqa jemaibqasai. 9 Ariya niŋgi endegsib are qalaib, “Pol a na iga ula egwajqa deqa anjam siŋgila na neŋgreŋyosiq iga qa qariŋyeqnu.” Niŋgi degsib are qalaib. 10 Bole, tamo qudei naŋgi e qa endegsib yomueqnub, “Pol a anjam siŋgila na neŋgreŋyosiq iga qa qariŋyeqnu. Ariya a iga koba na sosim anjam mergoqnsim iga a unoqnem di a siŋgila saiqoji. Anjam palontqajqa wau di dego a qaliesai bolesai.” 11 Tamo qudei naŋgi e qa degsib yomueqnub. Deqa e na kamba tamo naŋgi di endegsi minjrqai, “Anjam iga sawa isaq di sosim neŋgreŋyeqnum qaji di iga niŋgi koba na sosim olo dauryeqnum. Osim agi kumbra yeqnum. Niŋgi deqa geregere are qalsib poiŋgem.”

12 Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji. 13 Ariya iga tamo bei aqa wau qa gago segi ñam soqtqasai. Wau Qotei na egej qaji di iga olo buŋyosim tamo bei aqa wau qa gago segi ñam soqtqasai. Wau Qotei na egej qaji deqa segi gago ñam soqtqom. Wau Qotei na egej qaji agiende. Iga niŋgi Korin Kristen niŋgi qa waueqnum. 14 Deqa bati iga Qotei aqa anjam niŋgi merŋgoqnem bati di iga wau Qotei na egej qaji di buŋyosai. Agi iga namoqna niŋgi qa bosim Kristus aqa anjam bole niŋgi merŋgoqnem. 15 Wau Qotei na egej qaji di iga buŋyosim tamo qudei naŋgo wau qa gago segi ñam soqtosaieqnum. Wau Qotei na egej qaji di segi iga yqajqa siŋgilaeqnum. Di kiyaqa? Gago wau dena nuŋgo areqalo Yesus qa siŋgilato qaji di siŋgilaamqa gago wau nuŋgo ambleq di yoqnem qaji di tulaŋ kobaqas. 16 Amqa iga sawa isaq gilsim dia dego Yesus aqa anjam mare mare laqnqom. Sawa qudei dia tamo qudei naŋgi nami wauoqneb qaji iga deq gilqasai. Naŋgo wau qa iga laŋa areboleboleigim gago segi ñam soqtqasai.

17 Agi Qotei aqa anjam bei nami endegsib neŋgreŋyeb unu, “Tamo bei a ñam bei soqtqa marsimqa a Tamo Koba Qotei aqa ñam soqteme.” 18 Iga qalie, tamo bei a aqa segi ñam soqtqas di a Qotei aqa ŋamgalaq di ñam saiqoji sqas. Ariya Tamo Koba Qotei na tamo bei aqa ñam soqtetqas di a ñam bole oqas.